АНТОНИЙ НОВГОРОДСКИЙ

КНИГА ПАЛОМНИК

Се аз недостойный, многогрешный Антоней, архиепископ Новогородскый, Божиим милосердием и помощию святыя Софии, иже глаголется Премудрость, присносущное Слово, приидохом во Царьград ¹, преже поклонихомся святей Софеи ², и пресвятаго гроба Господня две досце целовахом, и печати гробныя, и икону пресвятыя Богородицы, держащую Христа, в того Христа жидовин ударил ножем в гортань, и изошла кровь; а кровьже Господню, изшедшую из иконы, целовали есмя во олтари малом ³. Во святей же Софии во олтари кровь и млеко святаго Пантелеимона во единой вети не /1б/ смятшися ⁴, и глава его, и глава Кондрата апостола ⁵, и инех святых мощи, и глава Ермолы и Стратоника ⁶; и Германова рука ⁷, еюже ставятся патриарси ⁸; и икона Спасова, юже послал [57-58] святый Гермон чрез море без корабля посолством в Рим, и блюдома в мори; трапеза ⁹, на нейже Христос вечерял со ученики своими в великий четверток; и пелены Христовы ¹⁰,и дароносивыя сосуты златы, иже принесоша Христу с дары волсви; и блюдо велико злато служебное Олгы Руской, когда взяла дань, ходивши ко Царюграду. Городок мал ¹¹ есть Цариград на Испиганьской стране ¹², по [59-60] стране Жидов ¹³. Во блюде же Олжине камень драгий, на том же камени написан Христос, и от /1в/ того ¹⁴ Христа емлют печати людие на все добро; у того же блюда все по верхови жемчюгом учинено. Ту же есть во олтаре телега сребряна Констянтина и Елены, и иных служебных золотых блюд с камением драгим и з жемчюгом, и сребряных множество разноличных, яже износят на службу во всяку неделю и в господьския праздники. Ту же есть во олтари вода и приведена по трубам ис колодязей ¹⁵; и вне дверий ¹⁶ олтаря малаго ¹⁷ стоит крест мерный, колико был Христос возвышен плотию на земли ¹⁸. И за тем [61-62] крестом лежит Аньна, иже давала двор свой святей Софеи, на немже и поставлен малый олтарь; и того ради положена бысть ту ¹⁹. И от того же олтаря недалече мироносица поют; и стоит пред ними икона велика пречистыя Богородицы держащи Христа ²⁰; и шли слезы от очию ея на очи [63-64] Христа Бога нашего. И дают воду, иже во олтари, на помазание всем человеком. И оттоле на той же стране церкви есть святаго апостола Петра ²¹: а в ней лежит святая Феофанида, иже ключь держала святей Софеи; тыя же ключя целуют. Ту же есть во церкви ковер святаго Николы висит. Ту же висят Петровых вериг железо вковано ²² в золотую икону; на праздник же Петровых вериг целует патриарх и вся люди ²³. А оттоле же во другой церкви лежит предний амбон хрустален ²⁴,егоже избил верх [65-66] святей Софеи падся ²⁵. От мироносиц же близь, во святей Софии есть гроб ²⁵ /2а/ мал детища ²⁶ святаго Анъфиногена: понеже посла Бог по душу Ангела, служащу святому Анфиногену со детищем во церкви. И пришед Ангел Господень во церковь, ста и глаголя Анфиногену: се мя Бог послал по душу отрочища сего, да ю восприиму. И глагола святый Анфиноген Ангелу: пожди, дондеже сконьчаю со детищем святую службу сию Богу твоему и моему, творцу небеси и земли, пославшему Сын свой к нам недостойным и многогрешным, на очищение грехов и на спасение душ наших и на пождание обращающимся от грехов и кающимся ко Господеви. И той глагол смиреный слыша Ангел Господень от Анфиногена, восприим послушание, и ста службе его ждый, дондеже скончает жертву. И совершив /2б/ Анфиноген службу со детищем, и ем за руку детища, и поклонився Ангелу Господню и дав его; Ангел же Господень, приим душу детища, и иде к Богу радуяся и веселяся, и славу возда Богу о спасении души отрочати. И инех же гробов во святей Софии несть развее того. И у того гроба есть кандило палося с маслом на мрамор и не разбилося; то же место огорожено есть древом, да на не человецы не ступят ²⁷. И оттоле же столп есть, идучи ко дверем, святаго Григория чюдотворца ²⁸ обит досками [67-68] медными: у того столпа явился святый Григорий; и народ, целующе и, трутся перьсмьми и плещама около столпа /2в/ на исцеление болезнем; и ту стоит икона святаго Григория ²⁹; и ту же у столпа на память его празднует патриарх, положив мощи его. И толе же, утвердив и на степени, написан образ Спасов велик мусиею: и у правыя руки не написал палца; а весь написав, рекл писец, зря на нь: Господи, како еси жив был, какоже тя есмь написал! И глас от образа глаголя: а когда мя еси видел? И тогда писец онемев и умре. И той перст не писан, но скован сребрян и позлащен.На стране же дверий стоит икона велика: а на ней написан царь Корлей о софос ³⁰, и у него камень драгий в челе, и светит в нощи по [69-70] святей Софеи. Той же царь Корлей, взем грамоту во гробе у святаго пророка Данила ³¹, и переписал ю /2г/ философьски, кому же быти царем во Цареграде, дондеже и стоит Царьград ³². У царьских дверей же ³³ есть медян романист ³⁴, рекше наров, в нюже замычют и заключивают царския ³⁵ двери; ту же народ накладывают у врат муж и жен, да аще кто будет яд змииный съел или отравление каково, то не может его выняти изо рта, дондеже вся злоба изыдет слинами изо уст.

У олтаря же великаго на левой стране место, идеже глаголал Ангел Господень ко отрочищу: не иду от места сего, дондеже стоит святая София ³⁶. На том же месте три иконы поставлены: а на них написано три [71-72] /3а/ Ангелы; и множество ту народа Бога молят. И оттоле близь место, идеже миро священное варят иконами ветхими, иже не знати святых; и тем же миром дети крестят. На той же на левой стране горе у терема великаго ³⁷ сошита пазуха ³⁸ златом; злата же вышло 4 капи ³⁹. В велицем же [73-74] тереме кандил 80, все сребляни; и на праздники Господьския новыя изменяют; а и инех кондил по всей церкви много, а вся сребряныя; яблоков златых множество. Во олтари же великом над святою трапезою великою, на среде ея, под катапезмою ⁴⁰ повешен Коньстянтинов венец ⁴¹, и у него же повешен крест, под крестом голубь злат; и иных царей /3. б/ венцы ⁴² висят окрест катапетазмы. Та ж катапезма вся сотворена от злата и сребра; а столпия олтарьныя и амбон, все сребряно. А у катапезмы повешены венцы малы, 30 их, в память всем християном и в незабытии Июдиных ради 30 сребреник, нанихже Господа Бога предаде; темже речено бысть: ядый мой хлеб возвеличил есть на мя лесть ⁴³; да разумевше вси хрисгияне, блюдутся Июдинаго злаго и неправеднаго сребролюбьства. Прежние же святители служаху завесою паволочитою, повесивше катапезму. Чего же ради та бысть? Видения ради женьска и всего народа, да немутным умом и сердцем Богу /3в/ вышнему, творцу небеси и земли, службу вослют. Потом же еретицы паки вземше тело Господне и кровь, не ведущу никомуже завесы ради, выплевавше воступаху ногами; ту же ересь уведевше святии отцы духом, привязавше завесы ты ко столпом катапезмы, и к патриарху и к митрополиту и к епископу и приставиша протодьякона, да зрит, да без ереси праведно служит Богу. Темже завеса в распятие Господне раздрася до долу безакония ради жидовьскаго, и тма бысть по всей земли, гроби ⁴⁴ отверзошася и мертвых телеса восташа ⁴⁵, дабы, видевше чюдо то, познали Сына Божия; зависти же ради и [75-76] гордости не покоришася, ни /3г/ покаяшася, ни поклонишася Сыну Божию каменносердый род еврейский, да тем чюдом обличени будут во страшное судище не токмо Жидове, но и вси невернии: занеже видят чюдо то бывшее о Сыне Божии, и не веруют в онь. Христос бо великое милосердие имея на Жидех, той чюдо сотвори, да бывше видевше и слышавше познали Сына Божия и покаялися о безаконнем своем убийстве; Жидове же познаша о чюдиси Сына Божия, но ни покоришася, ни покаяшася зависти ради и гордости: про зависть бо и про гордость Ангели с небеси свержени быша и претваришася в беси. Что бо ради печаловашеся Иисус, идя ко кресту? /4а/ Слыши бо, что рече во евангелии Христос, яко прискорбна есть душа моя до смерти ⁴⁶. Се же рече Господь, яко печалую, не зане умрети хощу; но зане Израильти свои быша, и ти хотят мя распяти; и того ради отврещися им царствия Божия.

Во святей же Софеи сохранени быша скрыжали Моисеова закона, и киот, в нем манна. Аллилуия поюще на амбоне, подьяцы держать скрыжали во Моисеовых место; а переносу поют скопцы, а подьяцы прежде, и потом поет чернець един; и тогда дары Господня понесут много попов и дияконов; бывает же тогда плачь и умиление и смирение велико от всего народа не токмо дне ⁴⁷ во святей Софии, но и на полатах ⁴⁸. Как же ли тогда страх и смирение и умиление /4б/ епископи и попове и дьякони имеют в той честней службе! Каки ли изрядныя дароносивыя златыя сосуды, каменьем и жемчюгом украшены, и [77-78] сребряныя! И как понесут светозарный иеросалим и рипиди, и тогда воздыхание и плачь бывает людем о гресех. Кий ум и какова душа, иже не помянет тогда о царствии небеснем и о жизни безконечной! И в каковой же ли чти и во смирении патриарх службу совершает! Се же, братие, поминающе, поревнуем таковой же службе быти со страхом, да получим добрую жизнь в сий век и в будущий.

И се же чюдо и страшно и святое явление: во святей Софеи во олтари /4в/ великом за святым престолом стоит крест злат, выше двою человек от земля, с камением драгим и жемчюгом учинен; а пред ним висит крест злат полутора лохтий ⁴⁹; водлее трех ветей повешена 3 кандила злата, а горит в них масло; а четвертую ветвий от верху повержено: та же кандила со крестом учинил великий царь Иустиян, иже святую Софию поставил; та же 3 кандила со крестом Духом святым вознесошася горе выше великаго креста, и паки снидоша низу тихо, и не угасла. То же было чюдо по заутреней, пред почятием литургии, иереом во олтари зрящим; и людие вси во церкви видевше, со страхом и радостию великою рекоша: уже нас християн посетил Бог милостию своею и молитвами пречистыя /4г/ Богородицы, и святей Софеи — Премудрости Божии, и молитвами царя Коньстянтина и матери его Елены; хощет ны дати Бог жития, якоже при Коньстянтине было, и боле ныне того будет: приведет Бог поганыя Жидове во крещение, и будут християне во единой любви, неимуще рати межу собою; но токмо на тех имут воевати, кто не восхощет во крещение внидти, да и волею и неволею принудит их Бог внити во крещение; обилия же всего добра на земли будет множество, и правда, и святым житием начнут жити людие, обиды же не будет; земля изнесет плод от себе Божиим повелением, аки мед и млеко, добраго ради жития християньскаго. Се же чюдо свято и честно /5а/ явил Бог в лето 6708-е, при моем животу, месяца маия, на память святаго царя Констянтина и матери его Елены, в 21, в день недельный, при царьстве Алексееве ⁵⁰ и при [79-80] патриарсе Иванне ⁵¹, на собор святых Отец 318, а при посольстве Твердятине Остромирица, иже пришел посольством от великаго князя Романа со Неданом и с Домажиром и со Дмитриом и с Негваром послом ⁵². Во святей же Софеи у олтаря на правой стране, ту есть моромор багрян, и ту поставляют престол злат, и на престоле поставляют царя на царьство. И по странам того места есть место огражено медию и да на не человецы не воступают, но то /5б/ место целуют народи: на том бо месте молилася святая Богородица к Сыну своему и Богу нашему за род християньский; то же видел святый поп в нощи, стражь нощный. И на той же стране поставлена икона велика святых Бориса и Глеба; и ту имеют писцы. И горе на полатах ⁵³ стоит патриарх, коли служат. Во притворе же за великим олтарем вчинены во стене гроба Господня верхняя доска, и посох железен ту же, и свердьлы и пилы, имиже чинен крест Господень; и уже железно во дверех Петровы темницы; и древо, иже на шии у Христа под железом было, тоже вчинено во икону крестом. В том же притворе над дверьми горе написан Стефан первомученик, /5в/ пред нимже подымают кандило; и кому очи болят, обвивают тем ужем главу, и здрави бывают очима. Ту же икона есть, в нюже уразил жидовин Христа в гортань; и ту же есть труба медная Ерихоньскаго взятия Иисуса Навгина; и ту же есть камень мраморян, издолблен аки кадь, кладязя Самарейска ⁵⁴, у негоже глаголал Христос к Самаряныни: [81-82] дай же ми воды пити ⁵⁵; въсквозе бо той камень Самаряне черпаху воду. А оттоле святый Аверкий ⁵⁶ и Григорей Великия Армении и Селивестр лежат; и ту же главы Кира, Иоанна и иных святых мощи много во святей Софеи. Ту же и крестилница водна ⁵⁷, и написан в ней Христос во Иердане крестится от Иоанна, со деянием написан: и как Иоанн /5г/ [83-84] учил народы, и как младыя дети металися во Иордан и людие; то же все Павел хитрый писал при моем животе, и нету таково писмени. И ту же есть древа, и чинит в них патриарх икону святаго Спаса 30 лакот возвыше; и Павел преже Христа написал, со драгим камением и со жемчюгом вапы ⁵⁸ стер на одном месте; у святыя же Софеи стояти той иконе и до днесь.

И егда же заутренюю пити ⁵⁹ хотят у святыя Софеи, прежде поют пред царьскими дверьми ⁶⁰ во притворе, и вышед поют посреде церкви, и двери отворят райския и третьяя поют у олтаря. А в недельный же день ставает патриарх на утрени и на /6а/ обедне, и в господьския праздники: и тогда благословляет певцов с полат ⁶¹; они же оставльше пение, понихронию ⁶² кличют, и потом начнут пение красное и сладкое, аки Ангели, и тако поют до обедний; а кончявше утренюю и разболокшися, вышед вон, возмут у патриарха благословение службы деля литоргии. А по заутрени чтут Пролог ⁶³ до обедни, на омбон возшедше; и егда кончают Пролог, и тогда почнут литоргию; а службу кончавше, молитву дорную ⁶⁴ глаголет старей иерей во олтари, а 2-й иерей глаголет молитву ту же во церкви за омбоном; и кончавшу молитву кождо, и благословяют люди. Тако же порану и вечерню поют.А колокола не держат во святей Софеи; но билцо мало в руце держа, клеплют на /6б/ заутрени; а на обедни и на вечерни не клеплют; а по инымь церквам клеплют и на обедни и на вечерни; било же держат по Ангелову учению; а в колокола латыни звонят.

И есть во Цариграде Неусыпающий монастырь ⁶⁵: по вся бо недели по церквам неизменно стоят чрез нощь [85-86] о света, молящи Бога; и тако творят присно; покаялных отцев белцев не держат, но иноков старых и умеющих заучити закону Господню.

Се же во царских златых полатах: крест честный, венец, губа, гвозди; кровь же лежаше иная; багряница, копие, трость, повой святыя Богородицы и пояс, и срачица Господня, плат шейный, и лентий, и калиги ⁶⁶ Господня ⁶⁷; глава Павлова и апостола [87-88] /6в/ Филиппа тело ⁶⁸, Епимахова глава ⁶⁹, и Феодора Тирона ⁷⁰ мощи, рука Иоанна Крестителя правая ⁷¹, и тою царя по ставляют на царство ⁷²; и посох [89-90] железен, а на нем крест, Иоанна Крестителя, и благословляют на царство; и убрус, на немже образ Христов ⁷³; и керемиде ⁷⁴ две, и лоханя Господня мороморана, и другая лоханя меньшая мраморяна же, в нейже Христос умыл нозе учеником; и креста два велика честная. Сеже все во единой церкви в малей, во святей Богородицы ⁷⁵. В велицей же церкви и у святаго Михаила ⁷⁶ и в тех же полатах: Коньстянтинов крест верху олтарных дверей стоит, с нимже на рать ездел ⁷⁷; ту же и труба Иисуса Навгина [91-92] Ерихоньского взятия ⁷⁸; и ту есть во олтари Авраамова овня рога: в ту же трубу и рога вострубят Ангели во второе пришествие Господне ⁷⁹; ту же /6г/ есть Самоилов рог, из негоже масло излиял на Давида царя ⁸⁰, и палица Моисеова, еюже море разделил и люди проведе сквозе не, а Фараона потопив в мори со Египтяны ⁸¹: той же посох и рог окован со драгим камением. И в малем олтари за святою трапезою покрыта трапеза, на нейже Авраам со святою Троицею хлеба ял ⁸²; и ту стоит крест в лозе Ноеве учинен, юже по потопе насадив; и сучец масличен туто же, егоже голубь внесе, в той же лозе есть. А у сторонних дверей во притворе на стене написан Христос мусиею велик стоящ, и поп пред ним кандило вжегл; и бысть ему кадящи фимияном, и глас бысть от образа к попови: ис пола ити деспода ⁸³; и потом в третий день пославлен ⁸⁴ /7а/ [93-94] бысть патриархом. Смотрим же, братие, сице добродетель доводит чти и сана великаго в сий век и в будущий. На преграде у великаго олтаря вчинен щит Коньстянтинов, и на нем ставят агнец на обою страну и дают причащение людем. Ту же есть во олтари Илиины милотии часть и пояса его ⁸⁵. Церковь же мощена красным мрамором ⁸⁶, а под нею доплеко, и подходят человецы, и учинено сквозе мрамор проходи. И егда внидет царь во церковь ту, тогда понесут под испод много ксилолоя ⁸⁷ темьяна ⁸⁸ и кладут на углие, и исходит воня проходы теми во церковь на воздух, и наполнится благоухания вся церковь; пение же воспоют калуфони ⁸⁹, аки Ангели, и тогда будет /7б/ стояти во церкви той аки на небеси или аки в раи; Дух же святый наполняет душу и сердце радости и веселия правоверным человеком. Под царьскими же дверьми в притворе стоит столп мраморян, у негоже ⁹⁰ привязаа был святый мученик Исидор ⁹¹, и с тем столпом вышел есть из моря; и мощи его ту суть. И иных святых мощей много во златых полатах целовали же есмя, и [95-96] образ пречистыя Богородицы Одигитрия, юже святый апостол Лука написал ⁹², иже ходит во град и Пятерицею ⁹³ в Лахерную святую ⁹⁴, к нейже Дух святый сходит ⁹⁵. В той же церкви есть риза святыя Богородицы и посох ея сребром окован, и пояс ея во прикупной ⁹⁶ раце ⁹⁷ [97-98] /7в/ лежит. Ту есть во прикупной ⁹⁸ образ Спасов, егоже Феодор християнин дал в поручение жидовину Аврамию ⁹⁹; ту же есть гроб Симеона Богоприимца ¹⁰⁰. В той же церкви под трапезою лежит Ияков, брат Господень ¹⁰¹; ту же и святый пророк Захария ¹⁰² лежит; в той же церкви и младенец половина лежит во столпе, а вторая половина во Иерусалиме ¹⁰³. Ту же есть во церкви 12 коша хлебов исполнено Христовым благословением, ихже Господ ял со ученики своими; а хлебы суть те во стене запечатани ¹⁰⁴.

И оттоле есть церкви святыя [99-100] Фотинии Самаряныни ¹⁰⁵, и ту и мощи ея лежат.

От тоя есть церкви святых безребреник Козмы и Дамияна велика; ту же святаго Анкидина лоб и /7. г/ Козмин окован сребром ¹⁰⁶. [101-102]

Далече же оттоле к морю идучи ¹⁰⁷, святая Анна девица в теле аки жива лежит скручена ¹⁰⁸. И оттоле над морем же святый Николае новый в теле лежит ¹⁰⁹.

А у Лахерны во церковных полатах святый Феодор Стратилат ¹¹⁰ лежит, и щит и мечь его ту же; над ним же стоит икона Иоанна Крестителя, в нейже замчены и запечатаны ¹¹¹ царьскою печатию власы Иоанна Крестителя ¹¹²; а верх святаго Иоанна Крестителя главы его и перси и перст его и зуб ¹¹³ лежат в Студийском монастыри ¹¹⁴ у святаго Феодора; ту же лежат святый Феодор [103-104] /8а/ и брат его Иосиф, Селуньский епископ, в монастыри Студиском во едином гробе ¹¹⁵; свитку же святаго Феодора, яже была от тела, в нейже мучен бысть, возлагают ея на гроб его на праздник его. Ту же и глава Захарии пророка и святаго Вавилы ¹¹⁶ и иных святых мощи и лице святаго Иоанна Крестителя.

В Маганьском монастыри у святаго Георгия ¹¹⁷ во церкви: верх главы святаго Георгия и рука святаго [105-106] мученика Прокопия ¹¹⁸ и иных святых мощи. А олтарь чинен у тое церкви со драгим камением, и над ним образ написан Спасов, како беседовал с Самарянынею у кладезя. А вне того притвора церковь святаго Николы ¹¹⁹, и ту воскипе в кадиле млеко ¹²⁰.

/8б/ А егда делаша святую Софию, в олтарьныя стены клали святых мощи ¹²¹. А кладези мнози во святей Софии ¹²². А на полатах кладези и оград патриархов и церкви мнози. Овощь же патриархов всякий, дыни и яблоки и груши, держат в кладязи повержено ужищем в кошницы; и когда ясти патриарху, и тогда выимают е студено. Тако же и царь яст.И баня патриархова на полатах; воды же по трубам возведены, а другая - [107-108] дождовая. И на полатах же исписани патриарси вси и цари ¹²³, колико их было /8в/ во Цареграде и кто их ересь держал. На полатах во церкви 5 глав лежат окованы со жемчюгом, аки отвес сребрян.

А по амболу ¹²⁴, к коневому торгу ¹²⁵ идучи, на левой стране есть церковь святыя Богородицы ¹²⁶: и ту есть трапеза Господня мраморяна, на нейже вечерял Господь со ученики своими в великий четверток.

А у святыя же и Апостольския церкви ¹²⁷ царь Коньстянтин с материю своею лежат во едином гробе ¹²⁸; и за тем гробом лежит [109-110] мрамор, а в нем стопа святаго апостола Петра, аки в воск воступил ¹²⁹; той же камень из Рима принесен.И в той же церкви во олтари лежит святый Иоанн Златоустый ¹³⁰ и Григорей Богослов ¹³¹; на олтарней же преграде святых мощи; ту же есть и безмездник 3-х раки /8г/ сребряны, и главы апостола Иякова брата Господня и Матфея евангелиста ¹⁸², а тело его лежит вне града; и иных апостол мощи лежат у Апостольския церкви. А под трапезою лежат святии Андрей и Лука и Тимофей ¹³³; а [111-112] порты ¹³⁴ апостольския лежат в олтаре за трапезою в раце; олтарь же посреди церкви ¹³⁵; а пред олтарем стоит столп мраморян, у негоже Христос привязан бысть ¹³⁶; а доска, на нейже положен бысть Господь, егда сняша его со креста, и тогда святая Богородица плакала, осязавши тело сына своего и Бога, и шли слезы ея на доску ту и суть белы видением, аки капля вощаныя: и та доска лежит во Понтократаре монастыре ¹³⁷. Ту же /9а/ во церкви ¹³⁸ святаго Спиридона глава, а рука его и мощи у святыя Богородицы у Одигитрия в монастыри под олтарем лежит; и святаго Феодора персть в той же церкви. А во Калуянове монастыре лежат мощи святаго Власия ¹³⁹ и глава его, и иных святых. А во Филатропове [113-114] монастыре ¹⁴⁰ гвоздь Господень ¹⁴¹ и кресты честныя и мощи святых в Пандопафтии же монастыри. А у Златых врат ¹⁴² святый Диомид и мощи его лежат ¹⁴³. А оттоле мощи святаго Мамонта, ту же есть и монастырь его ¹⁴⁴ [115-116] оттоле же святыя Карп и Папила в женьском монастыри во едином гробе лежат; а ту поставил церковь царь Коньстянтин ¹⁴⁵ С стран же того Трояндофилица ¹⁴⁶: /9б/ монастырей ту множество и мощей святых, и Илиины милотии ту часть есть. И той монастырь грады и селы ¹⁴⁷ и златом [117-118] богатее инех всех монастырей во Цариграде ¹⁴⁸. А оттоле святый Стефан новый в монастыри лежит ¹⁴⁹; и на память его главу приносят к погребу, идеже седел ввержен; главу же его носит епарх чрез всю нощь со множеством людей со свещами, зовуще: киролесу ¹⁵⁰. А оттоле святая Богородица Вергетри ¹⁵¹ метохие ¹⁵²: и ту же во церкви стоит посох железен со крестом святаго Андрея апостола. И в том [119-120] монастыри жил Сава, Сербьский князь, егда изыде от Святыя горы ¹⁵³. И близ того есть монастырь женьский, /9в/ в немже лежат во едином гробе 10 мученик, и девица царевна в теле на верху лежит ¹⁵⁴: тех же всех мучил Копроним поганый царь.

А оттоле же святаго Мокия монастырь ¹⁵⁵: а в нем церковь велика; и в той же церкви под олтарем [121-122] лежит святый Мокий и святый Самсон; от гроба его вода идет ¹⁵⁶. Недалече от монастыря того новый отец Еуфимей лежит, иже оковався в железах ходил ¹⁵⁷; оттоле же Кира, Иоанна мощи ¹⁵⁸. И странь того церкви святаго Луки есть, идеже всех умерших погребают ¹⁵⁹; в той же [123-124]церкви святый Анастасий ¹⁶⁰ без главы есть, а главу его украли. А толе святый Димитрий лежит в теле белец ¹⁶¹; а образ его аки святаго Мины. А от него в монастыри мужьском святаго Дия глава и мощи ¹⁶². И у столпа посторонь Богородицына монастыря лежит новый Евдоким во /9г/ сребряне гробе, аки жив ¹⁶³. И у Романовых врат ¹⁶⁴ святый великий [125-126] пророк Данил лежит, и святый Роман и Никита ¹⁶⁵. На стране же того [127-128] места при стене градней святая Настасия девица ¹⁶⁶ в теле лежит ¹⁶⁷. И оттоле святии Флор и Лавер в теле лежат ¹⁶⁸. Странь же ею церкви святаго Никиты; и нога святаго Никиты ту. Близ же того церкви святый Георгий ¹⁶⁹. У обою же сею церковию множество мучимо бывает.И оттуду святый Феодор преобразился ¹⁷⁰ месящи тесто в корыте чернице ¹⁷¹. И близ же того святый Никифор, патриарх Цареградцкый, лежит ¹⁷². И есть же манастырь, к Лахерней идучи, святаго Иоанна [129-130] Крестителя: и ту выпущают людий иа /10а/ праздник и на велик день 3-жды год до года, и кормят всех; а черниц не испущают из монастыря никогдаже; черниц же есть двесте; а сел не держат, но Божиею благодатию и пощанием и молитвами Иоанна питаеми суть ¹⁷³. О страну же того монастыря святаго Георгия: и ту лежит святый Феодор Секиот в теле, в сребряне гробе; и ту крест его на железне пососе, с нимже ходил на гору ко [131-132] святому Георгию молитися; есть же ¹⁷⁴ ту и потырь его мраморян, еюже служил; и многа исцеления болным от него бывают, пиющим воду ис потира ¹⁷⁵. И от святаго Полиекта ¹⁷⁶ бывает исцеление злуницам ¹⁷⁷ и иным болезнем. Странь же Апостольския церкви Всех Святых ¹¹⁸ есть церковь ¹⁷⁹: и ту глава святаго апостола /10б/ [133-134] Филиппа ¹⁸⁰ и иных святых мощи. А в Козмине и Дамьянове лавре и мощи их ¹⁸¹. Ту же и святая Еуфимия в теле лежит; се же от сего 10-е лето явившися от земля плотию: не ведяху бо ея, где положена бысть; святии бо отцы тою Еуфимиею препреша еретиков ¹⁸². А [135-136] святая Феодосия в женьском монастыри в теле лежит во сребряне гробе, и на перенос выносят ю, и на человеки поставляють, и болным исцеления от нея бывают ¹⁸³. И оттоле близ святый Исаия пророк под трапезою лежит ¹⁸⁴. Странь же того церкви есть святаго Лаврентия: и ту мощи его ¹⁸⁵. И оттоле горе идучи святый Антоней отец [137-138] лежит ¹⁸⁶; а от него святый Павел белец ¹⁸⁷ на Лугареве ¹⁸⁸, и святый /10в/ Иоанн Кущник лежит у врат двора своего ¹⁸⁹, и крест его на железне пососе.

А у святаго Воскресения [139-140] Господня ¹⁹⁰, на Черном великом уболе ¹⁹¹, идеже свеща вожигаются на великий [141-142] день ¹⁹²; ту же лежит святый отец Ауксентей ¹⁹³, иже жил на холме со святым Стефаном новым ¹⁹⁴; ту же и Маркел ¹⁹⁵ святый, иже ту церковь поставил велми чюдну: преже святыя Софии та церкви поставлена ¹⁹⁶; ту же страстий Господниих ¹⁹⁷ гвоздь и крови Господни: и празднуют в великий пяток. А по иным церквам не служат в великий пяток, ни у святыя Софии, но мыют церкви в тыи дни и бъбиовом ¹⁹⁸ листвием настилают во церкви. На том же уболе святых Маккавей главы и мощи ¹⁹⁹. А оттоле на уболе святаго Георгия ²⁰⁰ святый Леонтей поп Русин лежит в теле, велик человек: той бо Леонтий 3-жды в Иеросалим пешь ходил ²⁰¹. Странь /10г/ же того церковь есть святаго Платона: и ту мощи его ²⁰², и святый Иоанн [143-144] Милостивый ²⁰³; ту же дом святаго исповедника Павла, и ту под трапезою мощи его, и омъфор его и петрахиль его целуют ²⁰⁴.

Конец же Рускаго ²⁰⁵ убола церковь 40 мученик: и мощи их ту [145-146] лежат ²⁰⁶, а иныя ²⁰⁷ мощи в Севастии; ту же глава святаго Аникия ²⁰⁸. И оттоле церковь святаго Прокопия ²⁰⁹: ту же и лоб его. У Понтократаря же монастыря ²¹⁰ у задних врат святый Коньстянтин черьнец в теле аки [147-148] жив лежит ²¹¹; а у предних врат святей Изаиле ²¹² мощи. А странь тое церкви святыя мученицы Анастасии девицы ту лежит; всякое волхвование и потворы открывает ²¹³. А святыя мученицы Варвары мощи ея во церкви ея ²¹⁴; и от сосцу /11а/ шла кровь и млеко на землю, и [149-150] учинил Бог каменен сосец.А у Благовещения святыя Богородицы ²¹⁵ Роман певец лежит. А оттоле монастырь святаго Василия ²¹⁶: и ту петрахиль его и кость ручная святаго Симеона Богоприимца. И оттоле церковь святаго первомученика Стефана ²¹⁷: а в ней есть Стефанов лоб избит [151-152] камением ²¹⁸, и ныне съсит ²¹⁹ есть, и иных святых мощи многих ту.

А у Плакоты ²²⁰ же церковь святых мученик Гурия и Самона и Авива ²²¹: ту же и мощи их. И странь тое церкви ест церковь святаго Анисима, Павлова ученика ²²²: и мощи его ту.

А за Пятерицею ²²³ мощи святых Иулияна и Кирика и Улиты и святыя Феклы ²²⁴. И оттоле церковь есть святаго Агафонника ²²⁵, в нейже и /11б/ мощи его. Близ же Плакоты есть монастырь святаго пророка Илии ²²⁸ и в нем церковь, и в ней мощей [153-154] святых множество; а на праздник по всей церкви поставляют столы, и на них возлагают мощи святых.И во церкви святаго мученика Акакия, юже поставил царь Коньстянтин, в ней же и мощи его ²²⁷; и за олтарем тоя церкви святаго МитроФана гроб, перваго патриарха Цареградцкаго ²²⁸, ту и петрахиль его и глава; а тело его бив батоги, и зъжег поганый царь Копроним.

За подгорием же есть церковь святых мученик Сергия и Вакха: и главы их ту лежат, и рука Сергиева и кровь его; и святаго Епимаха кровь ту же в раце ²²⁹. [155-156]

У Подромия ²³⁰ есть церковь святыя /11в/ мученицы Еуфимии ²³¹: то же и гроб ея тощь, сребром окован; в той же церкве святый Георгий лежит. Сторонь же о Безкоимитами ²³² святая ²³³ мученица Иульания в теле лежит ²³⁴. В бозницы ²³⁵ святаго Самсона ²³⁶ посох его и петрахиль и ризы его; ту [157-158] же и сковърада, на нейже мучен святый Арест ²³⁷. У церкви святаго Акиндина ²³⁸ глава Ануфрия ²³⁹, и святаго апостола Фомы ²⁴⁰ нога цела, а лоб его за Пятерицею ²⁴¹.

И близ же святыя Софии есть церковь святаго Иоанна Богослова ²⁴²: ту есть камень, иже подложен был под главу святаго Иоанна Богослова во гробе его. В той же церкви во притворе лежит святый Георгий: той бо Георгий егда преставися, и несену ему на погребение мимо тое церковь, и ста у тое церкви и не движеся мимо итти, /11г/ ту и положен бысть; и много исцеление болным от него бывает. А иных святых многих не писал есмь, иже суть вне Царяграда; се же внутр града. И есть монастырь святаго Феодора и церковь его ²⁴³. [159-160]

За Испигасом ²⁴⁴ же Олофтири мощи и кровь ²⁴⁵; и то же лежит и святый Иоанн Милостивый в теле ²⁴⁶ у Испигаса ²⁴⁷.

А во Испигасе граде есть церковь святыих мученик Бориса и Глеба: в том граде явишася святии и исцеления многа бывают от них ²⁴⁸. Во Испигасе же граде во церкви святыя Богородицы ²⁴⁹ написан на стене святый Иоанн; и выросло у него из чела трояндофилов ²⁵⁰ цвет, в сыропустную неделю, аки сыр бело, и идоша вси гражане на видение то и на /12а/ покланение; стояло то знамение крестаобразно до Коньстянтина и Елены ²⁵¹. Во Испигасе же есть церковь святаго Николы Греческая ²⁵²; и странь ея жил Коньстянтин ²⁵³, и есть в теле явился цареви, и повеле царь патриарьху внести его во град и создати церковь во имя его и монастырь: и есть та [161-162] церкви у Понтократаря монастыря ²⁵⁴. А той Коньстянтин первее ²⁵⁵ жидовин бе и крещься, и научен бысть от Стефана новаго ²⁵⁶; во Испигасе есть церковь его. Странь же Испигаса и святыя Софии мощей много лежит.А оттоле святая Анастасия в теле лежит: та же и за мужем была, но милостынею и добрым житием спасеся ²⁵⁷. И есть церковь ²⁵⁸: а в ней 7 апостолов лежит, Урванова ²⁵⁹ /12б/ чад ²⁶⁰; а та церковь прежде и Царяграда поставлена. И странь того женеск монастырь святаго Иякова Перьскаго ²⁶¹: ту лежит святая Мария девица в теле ²⁶², и поставляют ю на человеки. И оттоле есть церковь святыя Ирины велика: ту же и мощи ея лежат ²⁶³; а оттоле в женьском монастыри есть глава Иринина. [163-164]

А во трудоватицах ²⁶⁴ за Испигасом на горе святый Зотик ²⁶⁵ лежит: тому бо Зотику повелел царь полаты здати; и он же взем злато и раздав нищим; царь же повеле его привязати ко хвостом двема конема, да его разторгнут; они же влекоша его по полю и сташа в лесе на едином месте ²⁶⁶; и ту и положен бысть святый, и церковь учиниша; ту же и /12в/ храмины поставиша недужным, и дают милостыню християне ²⁶⁷. И от него же Лазарь писец иконный: той первее написал во Цареграде во святей Софии во олтари святую Богородицу, держащую Христа, и два Ангела ²⁶⁸. [165-166]

И от того есть монастырь: и в нем лежит святый Анания апостол ²⁶⁹; а оттоле святый Фока корчмитин лежит ²⁷⁰. А в Мачюкове монастыри ²⁷¹ лежит святый Ассон ²⁷². А оттоле есть монастырь Кирсака ²⁷³ царя святый Михаил ²⁷⁴: и в том монастыри есть икона, а на ней написан [167-168] Христос, к немуже пошел бе человек в роте не по правде, и отвратил Христос лице свое от него. А оттоле же святый Данил столпник на горе в теле лежит ²⁷⁵; а по Даниле на том же столпе седел Акакий ²⁷⁶, /12г/ и той туто же лежит во церкви. В той же церкви лежит блаженая княгиня Ксения Брачиславля ²⁷⁷. А оттоле святии отцы 318, туто же мощи их.А оттоле в лес идучи есть монастырь Иверьский ²⁷⁸, в немже ²⁷⁹ лежит глава святаго Илария ²⁸⁰. В мужеском монастыри лежит царевна святая девица София ²⁸¹ в теле; а от иного бо злаго царя лежала сохранена 100 лет и явилася потом.А оттоле есть женеск монастырь: и в нем лежит Тарасий патриарх ²⁸². Есть же монастырь за Испигасом на [169-170] горе святая Богородица: и седел на столпе инок, и поставил монастырь той, а сел несть у него: и святая /13а/ Богородица явилася игумену того монастыря и повелела даяти милостыню; и игумен той преставляяся написал грамоту даяти милостыню, донелиже и монастырь стоит; и ныне дають всякому человеку хлеб и вариво и по чяши вина; всякъй же християнин грядый во Иеросалим или из Еросалима, то ту по вся дни ядят; и Грецы такоже ядят у них; и молитвами святыя Богородицы не оскудевает монастырь той. А от Царяграда до святыя Пятницы ²⁸³ день пешему идти.

А вне Златых врат ³⁸⁴ святый Никола Проби-лоб, и прокована вся икона сребром ²⁸⁵ и позлачена; а когда царь приидет, и тогда открывают сребро, и целует царь во главу, отнюдуже кровь шла, и паки покрывают /13б/ сребром. Не дошед же Пятницы мало, святая Еуфимия в теле лежит, и святая Пятьница в теле лежит, и носят на перенос; от нея святая Елена девица ²⁸⁶ лежит. [171-172]

У Калиполя ²⁸⁷ же святый отец Еуфимей ²⁸⁸ лежит.

А во Хрусополии ²⁸⁹ святый Василей новый ²⁹⁰ лежит: той бо святый Василей о страшнем суде написал ²⁹¹.

Мы же потщимся, братие, оставити всю злобу дияволю, и связавшееся любовию, и поревнуем тех святых житию, ихже память есть написана зде: тии бо святии человецы же беша, якоже и мы; но попраша всяку злобу жития сего и во уметы вся вмениша ²⁹². Мы же оставим та, от нихже /13в/ хощем разлучитися; и взыщем тех, идеже ны пойти радующися к живому Богу в жизнь вечную, не имущую конца. Се же на уведение и на память и на молитву благоверным человеком, еже есть во Цареграде, по Суду ²⁹³ извну града, от многа ничтоже святых написах, или во градех, или во святей Софии и во Апостольской церкви, иже паки во Цареграде. Мануил царь ²⁹⁴испытывал по всей [173-174] области Греческой и повелел звати всех попов и давати им пореперу ²⁹⁵, и монастырев ²⁹⁶ колико есть от конец Суда и до другаго конца ²⁹⁷. От Греческаго моря и до Русьскаго моря есть попов 40000, акроме монастырьских; а монастырев 14000; а у святыя Софии 3000 попов: /13г/ пятьсот ругу емлют, а полтретги тысящи не емлют; егда же умрет поп от пятисот, то от полутретги тысящи входит поп на место его; и спасаются служащеи во церкви Богом и святою Богородицею, славяще святую Троицу, Отца и Сына и Святаго Духа, купно и неразделимо, и хваляще пречистую Богородицу: тоя бо ради спасени бываем вси правовернии християне и получают вечную жизнь, и ныне и присно и во веки веком.Аминь.